講辭

Recently, I had the privilege to give a small talk to a group of graduating primary school students. Here is what I said.

*********************

校長，神父，各位嘉賓，各位老師，各位家長，各位同學，大家好。今日好多謝校長俾我有機會返嚟自己母校同大家見面。我係1979年畢業，係，35年前，嗯，大家都大概估到我幾多歲。

其實我畢咗業之後，都未有返過嚟。喺我嘅記憶入面，我母校仲係以前舊慈雲山村16座隔籬嗰個又細又舊嘅校舍。今日我返嚟，其實係要多謝我一位舊同學。早兩個月前佢搵我，同我講校長想搵一個舊生返嚟幫手頒畢業證書，我當然係飛身應承囉。不過跟住佢又話仲要講啲嘢去勉勵啲學生，我就開始有的擔心。我問佢：「咁即係講啲乜？」

依家諗返我都有啲傻。其實我同學自己都冇乜經驗，又點知講啲乜？不過果時我又冇諗得咁仔細，凈係覺得我同學係知道嘅，所以就問佢。佢就話：「嗱，你就同佢地講，第日升上中學、出嚟社會，都唔好自卑。我哋學校雖然唔係最有錢、資源最多、設備最好、又或者係最出名嗰間學校，但我哋有好好嘅老師，好好嘅教導，都好值得自豪㗎！」

我諗諗，字面上我同學都講得啱嘅，於是就「哦」咗一聲。其實我心諗：「唓，邊有人理你邊間小學㗎！」