教育

各位同學，我相信大家今日都非常開心，因為小學畢業咧。不過，好快開心就會過去。幾日之後，升中派位就會放榜，再過幾個星期，大家就會由一間學校裡面最威、最高班嘅學生，變成全校最細個、最低班、最容易俾人蝦嗰哋。而同樣嘅情況，喺將來仲會不停出現。中學畢業升入大學係咁。有冇讀大學都好，出嚟做嘢你又再發現，全間公司、全個機構，最低級、最細個嗰個就係你。好快你就會唔記得小學時發生咗乜嘢事。可能直到好多好多年之後，你先至好似我咁，開始記得翻哋。

舉一個我自己嘅例子。由於職務嘅關係，我經常都有機會到世界各地唔同嘅地方，尤其係唔同嘅機場。不過我嘅問題係我認路非常之差，經常都會喺機場盪失路，成日我都擔心會趕唔切班機、去唔到要去嘅地方、返唔到屋企。不過，通常我嘅擔心都會好快過去，因為機場一般都有好多路牌，我望吓望吓，都會搵到我要去嘅地方。喺呢個時候，我就會好懷念我嘅小學同中學，好慶幸我有機會接受教育，能夠睇得明哋路牌同指示。學校冇話俾我聽每個城市嘅街道、每個機場嘅結構，佢冇話俾我聽應該去邊度，或者應該點樣去，但係佢教識我辨別方向、點樣睇路牌，等我可以搵到我要搵嘅路，去到我想去嘅地方。呢個，就係教育嘅真義。然後，你就會好似我咁，滿懷感激，好多年之後，返嚟呢度，同各位老師講：多謝大家。